ကျွန်ုပ်တို့အကြောင်း

ကျွန်ုပ်တို့ကုမ္ပဏီသည် ဂျပန်နိုင်ငံအခြေစိုက် Suzuki Motor Corporation ၏ လက်အောက်ခံကုမ္ပဏီတစ်ခု ဖြစ်ပါသည်။ Suzuki Motor Corporation သည် မိသားစု ယက္ကန်းရုံလေးတစ်ခုမှ စတင်ကာ Suzuki Loom Manufacturing Co., ၊ Suzuki Motor Co.,Ltd နှင့် ယခုအခါ Suzuki Motor Corporation ဟူ၍ ကမ္ဘာတစ်ဝန်းတွင် ထုတ်လုပ်ရေးစက်ရုံများစွာ၊ ကုမ္ပဏီပေါင်းများစွာ၊လုပ်ငန်းခွဲများစွာဖြင့် အောင်မြင်စွာလည်ပတ်နေသော နိုင်ငံတကာကော်ပိုရေးရှင်း လုပ်ငန်းကြီးဖြစ်ပါသည်။ ကုမ္ပဏီ၏ ရုံးချုပ်သည် ဂျပန်နိုင်ငံ၊ Shizuokaခရိုင်၊ Hamamatsu မြို့တွင် တည်ရှိပါသည်။ www.globalsuzuki.com တွင်ပိုမိုပြည့်စုံစွာ ဝင်ရောက်လေ့လာနိုင်ပါသည်။
မြန်မာနိုင်ငံ၌ ၁၉၉၈ ခုနှစ် နိုဝင်ဘာလတွင် ဆူဇူကီးမော်တော်ကော်ပိုရေးရှင်း မှ အစုရှယ်ယာ ၇၀%၊ စက်မှုဝန်ကြီးဌာနမှအစုရှယ်ယာ ၃၀% ပါဝင်၍ ရန်ကုန်၊ တောင်ဒဂုံစက်မှုဇုန်တွင် "Myanmar Suzuki Motor" ဟူသောအမည်ဖြင့် စတင်တည်ထောင်ခဲ့ပါသည်။ ၁၉၉၉ ခုနှစ်မှစ၍ မော်တော်ကားနှင့် မော်တော်ဆိုင်ကယ်များ ထုတ်လုပ်ရောင်းချခဲ့သော်လည်း ၂၀၁၀ ခုနှစ်တွင် Myanmar Suzuki Motor အား စာရင်းရှင်းလင်းဖျက်သိမ်းခဲ့ရပါသည်။ သို့သော် မြန်မာနိုင်ငံမှ လုံးဝ ထွက်ခွာသွားသည်မဟုတ်ဘဲ မြန်မာဝန်ထမ်းအချို့ဖြင့် ကုမ္ပဏီအခြေအနေကို ထိန်းသိမ်းကာ အနာဂတ်လုပ်ငန်းများအတွက် ကောင်းမွန်သော အခွင့်အလမ်းကို စောင့်ဆိုင်း ပြင်ဆင်နေခဲ့ပါသည်။ ထို့နောက် ၂၀၁၃ ခုနှစ် ဖေဖော်ဝါရီလတွင် ဂျပန်နိုင်ငံအခြေစိုက် Suzuki Motor Corporation ၏ ၁၀၀% ရင်းနှီးမြှုပ်နှံမှုဖြင့် Suzuki (Myanmar) Motor Co., Ltd ကို တောင်ဒဂုံစက်မှုဇုန်တွင် တည်ထောင်နိုင်ခဲ့ပါသည်။ ၂၀၁၃ ခုနှစ်တွင် Suzuki Super Carry Truck၊ ၂၀၁၅ ခုနှစ်တွင် Suzuki Ertiga၊ ၂၀၁၇ ခုနှစ်တွင် Suzuki Ciaz တို့ကို တိုးတက်ထုတ်လုပ်ရောင်းချနိုင်ခဲ့ပါသည်။
ဝယ်ယူစီးနင်းကြသူ မြန်မာနိုင်ငံသားတို့၏ စျေးကွက်တောင်းဆိုမှုအရ ပိုမိုထုတ်လုပ်နိုင်ရန် Thilawa Special Economic Zone တွင် Suzuki Thilawa Motor Co., Ltd ကို ၂၀၁၈ ခုနှစ်တွင် ထပ်မံတည်ထောင်ခဲ့ပါသည်။ ၂၀၁၈ ခုနှစ်မှာပင် Suzuki Swift ကို အသစ်ထပ်မံထုတ်လုပ် ရောင်းချနိုင်ခဲ့ပြီး ၂၀၁၉ ခုနှစ် အစတွင် All New Suzuki Ertiga ကို မြန်မာနိုင်ငံစျေးကွက်အတွင်း ထုတ်လုပ်ရောင်းချခဲ့ရာ များစွာအောင်မြင်မှုရရှိခဲ့ပါသည်။၂၀၁၉ ခုနှစ်တွင် Suzuki (Myanmar) Motor သည် မြန်မာနိုင်ငံတွင် မော်တော်ဆိုင်ကယ်တင်သွင်းဖြန့်ဖြူးရေးလုပ်ငန်းကို စတင်ခဲ့ပါသည်။
ယခုအခါ ဆူဇူကီး(မြန်မာ)မော်တော်ကုမ္ပဏီလီမိတက် နှင့် ဆူဇူကီးသီလ၀ါမော်တော်ကုမ္ပဏီ လီမိတက် ၂ ခုပေါင်း ဝန်ထမ်းအင်အား ၄၀၀ နီးပါးဖြင့် ကောင်းမွန်စွာ လည်ပတ်ထုတ်လုပ်နေသကဲ့သို့ မြန်မာနိုင်ငံမှ လုပ်ငန်းရှင်များနှင့် တရားဝင်စာချုပ် ချုပ်ဆို၍ ၂၀၂၂ ခုနှစ်တွင် မြန်မာနိုင်ငံအနှံ့ အရောင်းဌာန ၆၀ နီးပါးဖြင့် စျေးကွက်အတွင်း အောင်မြင်စွာ ထုတ်လုပ်ရောင်းချနိုင်သည့်အပြင် မကြာမီကာလအတွင်း တိုးချဲ့ထုတ်လုပ်ရောင်းချသွားမည့်အစီအစဉ်များဖြင့် မြန်မာပြည်သူများနှင့်အတူ တောက်ပသော အနာဂတ်ကို တည်ဆောက်သွားပါမည်။